Friday, September 28, 2007

عشان محدش سألني إنت عامل إيه



أنا هعتبر حالة الصمت دي تعبر عن الترقب أكثر منها طناش لذلك إسمحولي أمارس بعض البارانويا وأرد على السؤال اللي كل جماهيري العزيزة مسألتوش


أنا :


1- فاضل 62 يوم يا جييش ونقول على الجراية عيش ، - ده طبعا لو الأخ الأكبر معملهاش فيا وودع قبلها اللهم طول في نفسه كمان وكمان كما طولت في نفس خوفو - بعدها هنتقل من بلاعة القوات المسلحة إلى بلاعة أكيد أكثر رحابة من بلاعات الوطن المتداخلة


2-كتابي هينزل كمان شهرين يا بشر عن دار أكتب للطبع والنشر والتوزيع وهيكون موجود في المعرض .. للي ميعرفش إسمه هيكون إسمه ذات وطن ، وللي ميعرفش إني باكتب شعر أصلا الكتاب ده شعر يا جماعة وانتظروا موعد حفلة التوقيع


2
مكرر - نسيت أقول إني مش لاقي حد يصمم لي الغلاف .. بس هنشره هنشره ولو حطيت عليه صورة نانسي عجرم


3-جاتلي زمالة طب طواريء في مستشفى الساحل بعد سنة ونص لف على التكليف وتنطيط بين الموظفين وممارسة الشعائر المقدسة في معابد آلهة الدمغة وختم النسر ودفاتر الحضور والإنصراف وده معناه حاجتين : أولا : إن ربنا تاب عليا من الشرك وصبأت و ثانيا : إنها خلاص هانت يعني فاضل 3 سنين بعدها أبقى أخصائي وأموت وضميري مرتاح


4- القرحة عندي قربت تفتح تاني .. كويس عشان مقعدش فاضي


5-تليفوني العزيز خد غطس في حوض مياه ( ده الكلام الرسمي ) أدى إلى وفاته بأسفكسيا الغرف وضياع كافة الأرقام.. كل اللي يقرا الكلام ده يبعتلي رقمه لو كان يهمه إنه يعرف إنه رقمه عندي وبرضه مش هتصل بحد والحاضر يعلم الغايب


6- وزني نزل النص ولوني إغمق الضعف .. أنصح أي حد عايز يعمل تان ياخد جيشه في الكيلو 88 طريق الواحات


7-عرضت عليها الجواز للمرة ال 345 ورفضت .. مش مهم أنا وراها لحد ما حد فينا ربنا ياخده


8- الدنيا لم تزل خربانة


بس خلاص

إنتظروا المزيد من تجلياتي



أحوال التعيين حسب الأمد والرفت

الله ، الوطن

6 comments:

عين ضيقة said...

فكيف إذن تضعين وردة في شعرك

و أنا لا أستطيع أن أحبك؟

ده طبعا خاتمة البوست اللى فات
انا بس عايزة اقولك ان العمل كويس لكن الخاتمة .... رائعة

ربنا يعينك ع الجيش يارب وعلى حبيبتك وتوافق ان شاء الله

ومبروك ع الكتاب

الأهم من ده كله بقى انى اقولك انى أخدت لفة ع البلوج وشغلك يستاهل المتابعة بجد

تحياتى وكل سنة وانت طيب

Unknown said...

هي مين دي بس ياباشا اللي بترفض؟

ماتقلقش ان شاء الله هتوافق في المرة ال 350

ومبروك ع الكتاب

علي فكرة أنا كنت قريت الشعر قبل ماتشيله من فترة تقريبا كان في بلوج دار سوسن


ومبروك ع الزمالة

عقبالي يارب ان شاء الله آخد زمالة تمريض في السلوم

:))

تحياتي

محمد سيد حسن said...

عين ضيقة

ربنا يكرمك يا ستي

أنتظر رأيك في السابق والقادم من النصوص

نورتي الرصيف



فنان فقير

الشعر هينزل إن شاء الله في الديوان بس إضطريت أشيله لأن الناشر كان هيشرب من دمي لو عرف


بالنسبة للزمالة عايزك أعرفك معلومة هامة وهي إن وزارتنا كل سنة بحال ويمكن السنة الجاية لما الوزير يتغير أو لما الرئيس يتكل أو لما الطب يتلغي وتحصل ثورة الممرضات الأحرار أكيد هتلاقي الكلام إختلف
المعنى: فكري في خطوة خطوة وربنا يلطف بينا

واء

محمد مصطفى said...

الله الله
انت دفعة
أبو زمل يعني
آآآآآآآآآآآآآآآآآخ
أنتم السابقون و نحن اللاحقون
ادعيلي

Anonymous said...

طززززززززززززززز
و إيه يعني

شاعر ؟
الشعراء على قفى من يشيل

خلصت جيش؟
برضه طز هم الكسبانيين ارتاحوا من شكلك الغلط

رفضت تتجوزك
و الله برافو عليها

محمد سيد حسن said...

مادو


منور يا عمنا

عايز أعرفك إن كلهم خونة



أنونيمس


إنت علقت على 3 بنود من 8.. مستني رأيك في الباقي على أحر من البتنجان المقلي

برضه منور